يا وطنى لم كلابك لا بنخافك ولا بنهابك قوم يا مصرى قول الحق.. مصر اتسرقت ولا لأ
التغيير التغيير مطلب كل المصريين
اول مطلب للشباب.. لاطوارئ و لا ارهاب
قولوا لاحمد عز بيه.. هى عزبة و لا ايه
قولوا لحسنى مبارك بيه .. انت عملت فى مصر ايه
من الفيسبوك ع التحرير كله هيهتف بالتغيير
يا برادعى بص و شوف.. احنا كسرنا حاجز الخوف
يا سادات قول لناصر بعد الثورة الشعب اتحاصر
يا مبارك يا رئيس ياللي بتنجح بالتزوير
مطلب واحد للجماهير.. التغيير التغيير
قوم يا مصري قولها قويه ..مصر بلدنا مش تكيه
شعبي الحر قالها قويه... بعد اليوم مفيش عبوديه
اصحي يا مصري بسرعة وفوق اصحي ورجــــــع المســـــــروق
امن الدوله للجواسيس ....مش لمواطن حر شريف
حسني بيه يا حسني بيه....قولي محاصر غزه ليه
التعذيب ليه ليه ...خالد عمل ليكوا ايه
لغاز المصري لينا لينا مش لحكومه بتعادينا
لا طوارئ و لا تزوير... التغيير التغيير
اللى يعذب أهله و ناسه يبقي عميل من ساسه لراسه
عيشه يا وزيره الندامه شاطره فى تصدير الخدامه
احلف بسماها وبتربها الحزب الوطنى الى خربها
يا حرية ياحرية مصر هتفضل بيكي قوية
هما بيكلوا حمام وفراخ واحنا الفول دوخنا وداخ
الى يزود فى الاسعار لينا المجد وليه العار
يا غزه يا غزه سامحينا معبر رفح مش بايدينا
يا للعار يا للعار باعوا غزه بالدولار
يا فلسطينى يا فلسطينى دمك دمى ودينك دينى
على وعلى وعلى الصوت الى حيهتف مش حيموت
الى غلو الاسعار خلوا بلدنا فى خط النار
يا حريه فينك فينك امن الدوله بينا وبينك
يا صحافة فينك فينك التزوير بقي قدام عينك
ياللي موافق ع التطبيع عمر ما شعبك ليك هيطيع
يا حريه فينك فينك الطوارئ بينا وبينك
يا جمال باقولها بجد بكره يبيعوا النيل والسد
البهوات يلبسوا على الموضه واحنا نعيش العشره فى اوضه
يالى بتغلى الاسعار بينا وبينك طلقه نار
عايزنها تبقى حره دا العيشه بقت مره
قولوا لأحمد بيه عثمان لا زم تتحاكم ياجبان
مصر ياأم ولادك اهم
امو خالد ياولداه حتسيبوها تقول الأه
ولا عدلى ولا حبيب ده نظامنا فرعونى خسيس
ولا حبيبى ولا عدلى اللى يموت ناسى واهلى
يا معارضتنا كفايه ذل عايزين ثوره تزيح الكل
مصر بلدي غاليه عليا . . مش هاسيبها للحرامية
بطل تمشى جنب الحيط فاضل ايه تبكى عليه
الحزب الوطني الديمقراطي......عاوز كل شبابنا يطاطي
يا خالد يا سعيد.....حقك را جع من جديد
وحدة واحدة شبابية ....ضد الهجمة الحكومية
التغير التغير مالهوش تاني يامصر بديل
ضاع الحق فيكي يا مصر .................... يا رحمن النصر النصر
علّي صوتك بالهتاف ......................... مش بنطاطي ولا وبنخاف
وقفة وقفة الكترونية ............ ضد حزب الحرامية
ادى اديها كمان طوارئ امتى هترحل امتى تفارق
يا ابو دبوره ونسر وكاب غاوي ليه حبس الشباب
يا حكمنا بالمباحث كل الشعب بظلمك حاسس
قولو لحبيب العادلى وسيده ... بكره الشعب هيقطع ايده
اكتب على حيطه الزنزانه حكم مبارك عار وخيانه
يا مباحث امن الدوله انتى مباحث دوله مين انتى مباحث دوله مصر ولا مباحث اسرائيل
واللى خانو العهد منا واستباحو كل حاجه واستاهنو بالعروبه واستكانو للخواجه عمرهم ما يكونو منا هما حاجه واحنا حاجه هما باعو الجلابيه واحنا اصحاب القضيه
مش بنخاف مش بنطاطى .. إحنا كرهنا الصوت الواطى ، إصحى ياشعب إصحى وشوف قتلوا خالد على المكشوف ، ولا عدلى ولا حبيب أرحل ياوزير التعذيب .. وإيلى بيقتل أهلة وناسة .. يبقى عميل من ساسة لرأسة
لما الشعب يقوم وينادى يا احنا يا هما فى الدنيادى
حاتم الجبلى 1 2 عالج مراتو بمليونين
بطرس بطرس بطرس غالى ابعد عنى وسيبنى فى حالى
قول يا مبارك يا مفلسنا انت بتعمل ايه بفلوسنا
قالو حريه وقالو قانون والشباب جوه السجون
احنا شباب مصر الجايين ولا بنخاف ولا بنلين قولنا كفايه ومش ساكتين
اه يا حكومه هز الوسط اكلتينا العيش بالقسط
ادي حكومتك يا نظيف نيمتنا علي الرصيف
ارحل ارحل ذي فاروق الشعب خلاص منك مخنوق
خالد خالد يا سعيد انت شاهد وشهيييييييييييييييد.
يسقط يسقط حسنى مبارك دم خالد عارى وعارك
مصري ورافض يوم اتهان مصري وعمري ماهبقي جبان
يا مبارك قول الحق ....انت ظالمنا ولا لا
افرحى يا ام الشهيد كلنا خالد سعيد
عالى وعالى وعالى الصوت ايلى يشارك مش هيموت
يا مبارك قول لولادك ان بلدنا مش أملاكك
قوم يا مصرى قولها قوية مصر قوية بيكوا وبيا
يلا يا مصرى غيير عيش من غير مصر فين هتعيش
الشعب المصرى اخبارك ايه حسنى مبارك دوسوا عليه
يا نظيف يا حبوب الشعب المصرى بياكل طوب
عايزين حكومه جديده الناس بقيت على الحديده
عبد الناصر قوم وشوف حسنى خاين على المكشوف
يا عيشه قومى من النوم عمال مصر ما داقوا النوم
اه يا حكومه هز الكاب اكلتونا العيش الحاف
مش حنفرط مش حنبيع حقنا فيها مش حيضيع هى بلدنا واحنا ولادها
هما شويه نصابين هما شويه كدابين
google_protectAndRun("ads_core.google_render_ad", google_handleError, google_render_ad);
الأربعاء يناير 26, 2011 11:31 pm
